А Э Б В Г Гу Гъ Гъу Д Дж Дз Дзу Е Ж Жъ Жъу Жь З И Й К Ку Къ Къу Кхъ Кхъу Кl Кlу Л Лъ Лl М Н О П Пl Пlу Р С Т Тl Тlу У Ф Фl Х Ху Хъ Хъу Хь Ц Цу Цl Ч Чl Ш Шъ Шl Шlу Щ Щl Ю Я l

Заремэ игъыбз — Нэгъуцу Саидэ

Зыри темытхыхьа
Хъумэ
Для плеера требуется установить Flash Player

Заремэ итхьамыкlагъо гущэри
Мы гъыбзэм къызэлъеlуат,
Бэлахьэу ащ къехъулlагъэ гущэми
Шэуджэныхьаблэ хегъаплъ.
Чылэмэ ялыеу хъугъэ гущэба
Орыджэ сышыпхъу дах,
Хьадэгъур мыщ къыщыуажэ гущэти
Укъакlуи тыхэунагъ.

Шэмбэтым ичэщы фабэ гущэми
Нысэищыжьыр рагъажь,
Уфэгуитlоу узыдэкlуагъэ джэгуми
Укъащи ухэмылажь.
Купэу мы джэгум къекlугъэ гущэмэ
Ялыеу сыдым уишlыгъ,
Къаомэ, шхончы мэшlуащэ гущэми
Уеукlи тыунэхъугъ.

А чэщым сыдэу удахэ гущэри
Заремэу сышыпхъу дах,
Уихьадэ цlыфэу теплъагъэ гущэми
Къаlожьышъ тыкъагъэдаlу.
Тыжьыны lэлъынри пlапэ фыжьыхэм
Дахэуи къарелыдыкl,
Шlуцlабзэу уиджэнэ лъапlэ гущэри
Зэкlужьэу боу ар зэикl.

А чэщыр уикlодыпlалъэ гущэуи
Сыд мыгъом уянэм фишlэн,
Хьазабэу зыхэудзагъэ гущэри
Егъашlэм щымыгъупшэн.
Ар lэтхъо-лъатхъоу бэу зэтхъожьыба
lэзэгъуи къыпфемыгъот,
Сыдэуи тхьамыкlэгъошхо гущэба
Щэlагъэ Тхьам регъэгъот.

Утхъэ пшlоигъоуи птыщы джэгузэ,
Лъфыгъэхэр дапщи укlуагъ,
Уахэтэу зыбгъэлъэразэ пэтызэ
Зыгори къыщыкууагъ:
– Заремэ щэм ыпсэ хехы, – аlозэ,
Чылэри къыочъэлlагъ,
Къэплъфыгъэм ихьадэ чъыlэ гущэри
Убгъэгуми къычlэфагъ.

Заремэ ышыпхъу цlыкlу гущэри
Ышъэ икlыным lукlагъ.
Ащ ышъхьацышъо ритхъыжьы гущэзэ
Бэрэ Заремэ еджагъ.
Уянэуи сянэм къылъфыгъэ гущэми
Бэлахьыр къыфыуагъахь,
Уянэжъэуи уихъяр къежагъэ гущэри
Сыдэуи зэхэогъап.

Унагъо о уихьэгъагъэ гущэмэ
Тэрыджэ бэу насыпыгъ.
Зэхэтлъхьажьыгъэмэ зэ щыгъыныхэр тlозэ,
Тэ тыбгъэшэхъугъ.
Джы гугъэузэу уишэты лъагэми
Зэкlэми тыкlэлъырыс.
Хьадрыхэ хабзэ щыlахэ гущэмэ
Джэнэтыр къыуерэпэс.

А чэщ дэдэм lэзапlэ гущэми
Елбэтэу укъынагъэс,
Ау сыд мыгъор ишlуагъэ гущэти
Къытаlуи зигъонэмыс.
А ебэуи гузэжъогъу чэщыми
Уянэшхэр уихьадэщэжь,
Ящагу ащ дэхъухьагъэ гущэри
Яузышъ агу дэмыфэжь.

Нэфылъэм ищэ хэхыгъо гущэми
Уихьадэ къынагъэсыжь,
Уи Мыекъуапэу уадэжьы гущэри
Гъашlэми умылъэгъужь.
Апсэ хэlэжьызэ уятэшыпхъухэм
Якlыи макъи зэлъэlу.
Шыхэм япцlымэмэ макlэ гущэми
Къиныкlэ цlыфхэр ядэlу.

Уибэнтехъо шхъонтlабзэ гущэба
Данэуи шъо техьэ-текl,
Уидэкlыжьыкlэ гухэкlы гущэба
Сыдэуи тызэонэкl.
Заремэу сышыпхъу дахэ гущэба
Егъашlи тыгум уилъын.
Тимурэу зигъонэмысы гущэри
Гушlоуи къыппэгъокlын.

Нэгъуцу Саидэ • Нэгъыщэ: , ,

Тетхыхь